Nico Hülkenberg ka hyrë më në fund në historinë personale të Formula 1, duke u ngjitur për herë të parë në podium pas një karriere të gjatë dhe të durueshme.

Piloti gjerman 37-vjeçar siguroi vendin e tretë në Çmimin e Madh të Britanisë në Silverstone – një rezultat i papritur, por plotësisht i merituar.

Pas 238 garash pa podium, Hülkenberg arriti ta thyejë më në fund mallkimin në garën e tij të 239-të, duke u ngjitur në shkallën e tretë të podiumit me makinën e tij të Kick Sauber.

Gara u karakterizua nga kaosi i shkaktuar nga shiu dhe incidentet e shumta, të cilat krijuan mundësinë që veterani gjerman të përfitonte dhe të ngjitej në pozitat kryesore.

Ajo që e bën edhe më të veçantë suksesin e Hülkenbergut është fakti se ai e nisi garën nga vendi i 19-të, me pritshmëri të ulëta edhe për zona pikësh.

P3 – YEESSSSS!!! 🤩

NICO HULKENBERG SCORES HIS FIRST F1 PODIUM IN HIS 239TH RACE 👏👏👏#F1 #BritishGP pic.twitter.com/rKHNIdIfZL

— Formula 1 (@F1) July 6, 2025

Por falë një strategjie të zgjuar, kohës së duhur për ndërrimin e gomave dhe menaxhimit perfekt të situatave kaotike me makinat e sigurisë, ai u ngjit në vendin e tretë dhe në fund e mbrojti me sukses këtë pozicion përballë Lewis Hamiltonit, i cili e ndoqi ngushtë me Ferrarin e tij, por u detyrua të kënaqet me vendin e katërt.

Kjo është hera e parë që Hülkenberg hyn në Top 3, pasi më parë rekordi i tij më i mirë kishte qenë vendi i katërt, i arritur në tre gara të ndryshme gjatë karrierës së tij.